Durada : 2h
Tèxtes e lectura preu : Miquèu Baris.
Credit fotografic : Miquèu Baris, Ofici de Torisme deu Senhans, Wikipedia, autes
Un partenariat : IEO, IEO 40, Camille Jautrou (Servici civic IEO - FFCU).
Aquesta visita de Seignanx que's pòt completar dab las visitas de Baiona, Anglet e Biàrritz.
Las visitas que son tanben disponiblas en francés.
Endé nos har saber çò que pensatz de la visita, empleatz lo nòste questionari de satisfaccion.
-------------------------------------------------------------------
Que’n voletz saber mei sus la nòsta Comunautat de Comunas aperada deu Senhans ? Entratz a nòste, n’augitz pas paur. Que vse’n desvelaram los secrets e mèi qu’aquò !
Per començar, aprenetz qu’aquera Comunautat e s’estenè ne i a pas tostemps dinc a las pòrtas de Baiona, dinc ad Ador exactament, e que lo son capdulh e n’èra dinc au 1èr de junh de 1857 Sent-Esprit-deu-Cap-deu-Pont. Que l’an medish abracat, a la fin deu sègle 19au, d’ua partida de Tarnòs, en crear la vila deu Bocau. Copassejatge electorau, ce diràn d’aubuns, tà divisar l’electorat comunista entre dus departaments e tres vilas ! Benlèu, mes atau qu’es !
Uei, Sent Esperit qu’es estat restacat a la vila de Baiona, au parat de l’arribada de la linha deu camin de hèr. E lo Bocau au departament deus Pirenèus-Atlantics... N’es pas per autant que Tarnòs n’es adara lo capdulh, puish qu’es a la vila de Sent Martin de Senhans que n’an hèit l’aunor !
Ueit comunas que vivan donc amassa : Sent Martin de Senhans, Tarnòs, Ondres, Sent Laurenç de Gòssa, Sent Bertomiu, Sent Andrèu de Senhans, Biudòs, e Biarròta. L’ua d’entre eras que lutza de mei en mei de cap a Baiona. Mes qui sap çò que haré dens la grana Comunautat d’Aglomeracion deu País Basco ?... I pèrder la soa identitat gascona benlèu !
Qu’assajarèi de vse las har descobrir, aqueras comunas, l’ua après l’auta, de’n véder dab vosatis la soa istòria, entre la vila industriau de Tarnòs, los vilatges ruraus de l’interior deu país, e lo vilatge de mei en mei toristic d’Ondres.
Que’vs poiratz har atau lo vòste punt de vista sus aquera comunautat umana, mercada de fòrt bèra faiçon per la soa apartienénça ad un país de raça gascona que lo Bascoat vesin a enveja de se l’engolir tot blos.
Per l’òra, que resista enqüèra, mes dinc a quan ? L’aviéner que ns’ac diserà !...
(C) IEO - Tots drets reservats / Tous droits réservés
