«Какая-то святая тишина лежит на девственном творении, и душа сливается с дикою, но величественною природой» диэн нуучча улуу суруйааччыта Александр Бестужев-Марлинский Өлүөнэ очуостарын кэрэтин хоһуйбута. Улуу суруйааччы курдук маннык уустаан-ураннаан хас биирдии ыалдьыт хоһуйара уустук буолуо да, бука бары айылҕа кэрэтин кэрэхсии көрөллөр.
Өлүөнэ очуостара күн тахсыытыгар ордук кэрэтик, алыптаахтык көстөллөр. Бастакы күн сардаҥалара кытархай тааска түһэн очуос таастар былыргы сүдү дыбарыаска кубулуйаллар. Дыбарыас аннынан устар өрүс күн уотугар араас өҥүнэн дьииримнии оонньуур. Күн тахсыыта – киһи үчүгэйгэ талаһар, барытын саҥаттан саҕалыыр, инникигэ эрэлэ күүһүрэр кэмэ.
Оттон күн киириитигэр Өлүөнэ очуостара сырдык саарыл өҥнөнөн киһини дьиксиннэрэр. Күн тахсыытыгар көстүбүт сүдү дыбарыаспыт аптаах куһаҕан киһи дыбарыаһыгар кубулуйар. Сырдык саарыл өҥүнэн киэргэммит айылҕа сарсыҥҥы күнү көһүтэргэ эрэйэр.
